وسط زحمة بشر متنتهيش
المسلم والمسيحي والمفيش
رافض اكون حد منهم
رافض اقتل عقلي واعيش
صفر مركون ع الشمال
ملوهش قيمة ف السؤال
ولا ف الجواب ولا ف الكتاب
ملوهش عازة
يتمسح..ميتقريش
وسط زحمة بشر متنتهيش
كلماتي
مصطفي التلواني
الصورة من اعمال الفنان..عبدالرحمن الصواف
علمتيني اعشق تفاصيلك
واغزل وصفي علي عودك
من غير حروف
نفسي اشوف
كلام القلب
ف الخطاوي
قربيلي
اوهبيلي
لحظة منك
اصلي غاوي
حب طاهر
من غير كسوف
اسمعيلي وسمعيهم
كلمة منك
طالعة ليا
راسمة فيا
حلم ليكي
وبين عنيكي
انقشيني وامسحيهم
زي ماضي
وقلبي حاضر
حبة واقف
نخل عالي
ف حضن ارضي
للعلالي
و فيكي سارح
حبة راسم
ف الملامح
شط صافي
مرسى دافي
وبين ضلوعه
ضلع طيب
تاني ليكي
ازرعيه
واكتبيني
كلمة حلوة
ف البداية
اسمي آدم
وانتي حَوا
والحكاية
ف كل خطوة
مرسومة فينا
قدام عنينا
نص ليا
ونص ليكي
فص مني
وفص فيكي
ف رحلة واحدة
من غير نهاية
كلماتي
مصطفي التلواني
البسمة بين عيون الكون
تغير منك
ومن فرحِك
والارض والسما والكون
تكون لعبِك
ف مكتبتِك
يا روحي اللي طايرة بخفة
من يوم كنتي ف اللفة
ولحد يوم تكون زفة
انا ضَهرِك
ونور صُبحِك
كلماتي
مصطفي التلواني
دوب روحه ف قلب الشاي
ورسم صورة لقلب سعيد
فرحان بالدنيا ومش بكاي
يشبه طفل ف يوم العيد
رمى تكشيرته ف وش الدنيا
وشَب لفوق وبصوت عالي
قالها هاتي كمان حرية
واوعي تردي تقولي انا مالي
اصلك مديونة عليكي تسدي
وياما عطيتك واستنيت
زي ما تاخدي زي ما تِدي
ومفيش مرة غير ولقيت
ما بين خطاويا ناي مكسور
وسجن كبير حاضن الكون
بين قضبانه بكون محشور
لا اقدر اعيش ولا اقدر اكون
لكن اليوم مش هستحمل
هبني لنفسي براح من نور
هقتل عِندك واقدر اكمل
حر طليق واعيش مسرور
كلماتي
مصطفي التلواني
مركب ورق تايهة بين شطين
والبحر الازرق معكوس ف نني العين
الرملة دهبي تحضن كعبها
والدمعة رقصة نازلة ع الخدين
كلماتي
مصطفي التلواني
تسمحي
استلف قلبك
يصاحب قلبي دقاته؟
تسمحي
استلف املك
يشاطر حلمي طرقاته؟
واكتبلك غنوة علي اسمك
اتشكل لوحة من رسمك
اجمع اسمي علي اسمك
يكون ناتج شبهي وشبهك
تسمحي؟
لحد ما عمرنا يكمل
والورد ع الغصون يدبل
يتعلم مننا العشاق
حكاية الاحلي والاجمل
ونعطي للقلوب فكرة
ان العشق مش ذكري
يتحاكوا.. ويندموا عليها
لو مرة اتجَمعُوا..صدفة
تسمحي؟
كلماتي
مصطفي التلواني
ساعات..لما قلوب البشر بتضيق
وموج الوحدة بيشتد
بكون غريق
بنزل قلب الشوارع
الاقي القمر خجلان
والورق ع الفروع دبلان
بشوف عيوني الدبلانين
من كتر البكا
ف مراية السما
برمي الطريق وري ضهري
وبسيب خيالي ع الرصيف
يضحك علي احتياجي وفقري
لحد قلبه كان كفيف
والسكوت بيدور معايا
حتي ف عز الكلام
وقت ما تطلب معايا
انسج خيوط الكلام
وابكي النسمة علي حالي
ف قصيدة من ارتجالي
حفرتها ف جبين الشجر
وقت المطر
اللي اصله كان دموع
ونازلة تغسل البيوت
والدروب
والقلوب
اللي مليانة بخشوع
لحظة ما كنت انا
ف عز فيض الدموع
واقف بنادي رب السما
يفيض عليا برحمته
ويملي قلبي بالدفا
لحين احقق حكمته
واكرم قلوب..مفهاش وفا
كلماتي
مصطفي التلواني
مصطفي التلواني 
