جدي كان ايام زمان ف برد يناير..عز الشتا بيحب طعم البرتقان وسط لمة العيال وبيجيب معاه سوداني وترمس ولب محمص عرقان ف ايده المتشققة اللي رغم الشقا مليانة بيوت حب ودفا زي بتاع ايام زمان ... جدي كان..بيلمنا ف حضن الحكاوي ..يضمنا ويقولنا عن زرعة خضرا وارض سمرا وسد اتبنى بالمصابرة وفلاح بفاس وشوارع كات مزحومة ناس قلوبهم مسكونة بايمان طريقهم مزحوم بالامان من غير لا سور ولا حراس وناس بتتعب لجلن رغيف مخبوز بقمح بلدي ونضيف وناس بتكسب كتير كمان لكن هدفهم طيب شريف وناس بتشرب من قلب نيل غنوله ياما كتير زمان على صوت نايات .. على صوت نايات جدي كان..بيعصر الذكريات ويسرح ويفكر من سكات يقولي لما تشوف الهوا بيرعشه متصدقوش ولو حسيت ف يوم انه كف عن الدروب يبقى لسة متعرفوش بٌص له ساعة الغروب والشمس نايمة على صفحته بٌص له ساعة الغروب الثورة مالية سكته ميت بركان جواه اصله زيه زيك ملوش ف البكا ولو قال ف مرة الآه واشتكى بيتحمل ويكمل ولا يمكن عن طريقه يتوب لجل ما يرَجع ايام زمان واللي كان ايام زمان
ولسة عايش ف دور عيل بيعيط لو زعل مرة ويرسم ضحكة من غير صوت ويغني على روحه ويطبل على ضهر اللعب مَرَة على وش الحياه المُرة لو اهله سابوله الحبل ع الغارب ومش فارقة تنام غالب او خسران طول ما النية توب ابيض تعاريج العمر.. قدامك.. بتتكسر والاجابات بتتفسر وخطوة بخطوة تتعمد تعيش الحلم م الاول وتاخد ف السفر روحك وتحدد نور الصبح على قدك ومين قدك الجرح فيك مهما يطول شفاه بلسم بكلمة حلوة..تتقسم نص يدوب ف نور قلبك ونص يكون عشان صبرك ميملش طول الوحدة والمشوار وروح الليل ف الاسرار
ومهما يخون صاحب ولا كان دور تاني ف فيلم رخيص او قصة حب..ومتسواش تستطعمها مع الذكرى لبنت ضميرها مبيصحاش بتفتح قلبها بالتراخيص للي يدفع ويتسلى انت انت كما كنت لا هتخاصم ولا ثورت بتنسى الطعنة مع الايام وبتمسح على قلوبهم ببصة بريئة من عيل دافي عتابه عز البرد شايف الدنيا لون الورد مبيعرفش لو يزعل يخاصم اهله ويقَفِل
ادخلوني بسلام آمنين .. ف عز الناس انا وحدي بدور ع الوَنَس فيا بوزع فرحة مش عندي برسم بسمة مش ليا ف عز الناس انا حيران غريبة يا طباع الانسان نبع فلوس مبيرويش من غير حب يعيش بهتان بقلب اصفر يتفتفت مع اول حضن حنية وبال فاضي يتشتت لو صادف يوم ملاغية هتلوِن عمره بالاخضر وتزَوق طعمه بالسكر
_بيفكر بيقدم خطوة ويأخر
ف عز الناس انا ساعتي بتحسب عمري بالسنتي بتخصم ولا بِتجَمٌَع مش فاضي احاسبها ولا حتى هاراقبها خلاص قررت راح اسيبها واسيب الوقت يتلفها
صناديق الماضي هقفلها هصاحب روحي على قلبي هاخد ف الحياة رحلة صعبة او كانت سهلة قلمي وكراستي هنا جنبي ف حالة عشق ويا الناس ف عز الناس
حجاب مبين كل حاجة وبنات كتير مش لابسة حاجة مانيكان ف قلب الفتارين وناس جيوبها ناقصة حاجة لا ماعونة امريكية نافعة ولا حتى ميت جمعية شافعة دي عيون بتمسح فتارين ماشيين ف قلب بعض دفعة ف وسط البلد
اللي حاضن ايد حبيبته واللي قافش كتف خيبته وبوسة طالعة ف قلب زحمة من خطيب لايد خطيبته
نازلين مخصوص لفيلم سيما من بعده غدوة عليها قيمة وعشان يبان كريم ف عينها يجيب هدية عقد زينة
من عجوز واقف لوحده م الصبحية الحر هده والشمس مش سايباه ف حاله لكن محظوظ ولا حد قده
اول ما شاف البلدية زَوغ ف حتة مدارية وباعلو كام عقد زينة لست حلوة اجنبية بتتمشى ف وسط البلد
عاجبها شموخ التماثيل وبرد كوبري قصر النيل وشمس مصرية حافية بتنادي ورد ومناديل
ثابتة ف صورة ضوئية لقطتها ساعة مغربية ببسمة حروفها حزينة على صورة كانت حقيقية
لعيون بتصرخ م الوجع حواليها مليون جدع جالهم صرع..بالاوامر مفهومش ولا واحد جدع
وبنت بلدي شعرها مكشوف ورخص عرضي باين ع الضيوف لما الاهالي من قريب نهشوه والظلم طايله من غير كسوف
وانا دمي والع ما بينطفي من سجن واسع ما بيكتفي بالع زهور الارض خضرا على بابه المرؤة بتختفي
قام الكلام شط مني سألت سين غصب عني يا ناس كفاية يا ناس حرام ليه الظلم ده كله يعني؟!
ف جت اجابة من بعيد ف كلبش مصنوع من حديد وتهمة ساكنة بين ضلوعي خدتني ورى قضبان بعيد
علمتيني اعشق تفاصيلك واغزل وصفي علي عودك من غير حروف نفسي اشوف كلام القلب ف الخطاوي قربيلي اوهبيلي لحظة منك اصلي غاوي حب طاهر من غير كسوف اسمعيلي وسمعيهم كلمة منك طالعة ليا راسمة فيا حلم ليكي وبين عنيكي انقشيني وامسحيهم زي ماضي وقلبي حاضر حبة واقف نخل عالي ف حضن ارضي للعلالي و فيكي سارح حبة راسم ف الملامح شط صافي مرسى دافي وبين ضلوعه ضلع طيب تاني ليكي ازرعيه واكتبيني كلمة حلوة ف البداية اسمي آدم وانتي حَوا والحكاية ف كل خطوة مرسومة فينا قدام عنينا نص ليا ونص ليكي فص مني وفص فيكي ف رحلة واحدة
دوب روحه ف قلب الشاي ورسم صورة لقلب سعيد فرحان بالدنيا ومش بكاي يشبه طفل ف يوم العيد رمى تكشيرته ف وش الدنيا وشَب لفوق وبصوت عالي قالها هاتي كمان حرية واوعي تردي تقولي انا مالي
اصلك مديونة عليكي تسدي وياما عطيتك واستنيت زي ما تاخدي زي ما تِدي ومفيش مرة غير ولقيت ما بين خطاويا ناي مكسور وسجن كبير حاضن الكون بين قضبانه بكون محشور لا اقدر اعيش ولا اقدر اكون لكن اليوم مش هستحمل هبني لنفسي براح من نور هقتل عِندك واقدر اكمل حر طليق واعيش مسرور
مصطفى التلواني
