عبيط

زمان انا كنت عبيط

عندي شوية شخابيط


راسم حلمي ف كراسة

وطيارة ملهاش خيط


بجري ويا احلامي

نفسي اسابق ايامي


بَعِد نجوم السما

وخيالي ماشي قدامي


زمان انا كنت عبيط

كان عندي لعب كراكيب


ولبس مالي الدواليب

كنت البس جزمة ابويا 


واقوله سيب ونا سيب

واتزحلق فوق مشاية


اجري مامتي ورايا


واتخفى تحت سريري


واخد نضارتي معايا

زمان انا كنت عبيط


كان ف عيوني امنية

واضحة مش مخفية


كان نفسي اطلع ظابط 

واقبض ع الحرامية

او حتى اطلع قاضي


بيعرضو عليا قواضي


مخلي شيطاني محتار


وقاعد دايما فاضي


او اكون فاهم متعلم


صورتي حلوة وبتكرم


من واحد اسمه وزير


ماسك ايدي وبيسلم


وانا حر وكلمتي حرة


طارد خوفي على برة


مسلم قلبي لربي


وكلمتي مسموعة من فترة


زمان انا كنت عبيط


كنت اسمع ف النشرة


ان مقامنا بحشرة


ف سبيل قعدة كرسي


لواحد محتل النشرة


انا كنت اسمع كلماته


احلف بحياته


واقول دي كدبة وفشرة


مانا برضه زي ولاده


اكيد كنت عبيط


معرفش ان ابويا فقير


بيشقى ويتعب كتير


عايش على باب الله


زى قرايبنا كتير


وماشي جنب الحيط
مغمض عيونه


ابويا اللي كان عبيط
سايبهم سايقينه


وانا..هخلف ظنونه
عمري ما هبقى عبيط


زمان انا كنت عبيط


كلماتي 
مصطفي التلواني

لسان عايز قطعه

انا

   ادخلوني بسلام آمنين
 ..
ف عز الناس انا وحدي
بدور ع الوَنَس فيا
بوزع فرحة مش عندي
برسم بسمة مش ليا
ف عز الناس انا حيران
غريبة يا طباع الانسان
نبع فلوس مبيرويش
من غير حب يعيش بهتان
بقلب اصفر
يتفتفت
مع اول حضن حنية
وبال فاضي
يتشتت
لو صادف يوم ملاغية
هتلوِن عمره بالاخضر
وتزَوق طعمه بالسكر

_بيفكر
بيقدم خطوة ويأخر

ف عز الناس انا ساعتي
بتحسب عمري بالسنتي
بتخصم ولا بِتجَمٌَع
مش فاضي احاسبها
ولا حتى هاراقبها
خلاص قررت راح اسيبها
واسيب الوقت يتلفها

صناديق الماضي هقفلها
هصاحب روحي على قلبي
هاخد ف الحياة رحلة
صعبة او كانت سهلة
قلمي وكراستي هنا جنبي
ف حالة عشق ويا الناس
ف عز الناس

كلماتي

مصطفى التلواني

   بشويش وانتو خارجين

الابنودي الخواجا لامبو

وسط البلد

حجاب مبين كل حاجة
وبنات كتير مش لابسة حاجة
مانيكان ف قلب الفتارين
وناس جيوبها ناقصة حاجة

لا ماعونة امريكية نافعة
ولا حتى ميت جمعية شافعة
دي عيون بتمسح فتارين
ماشيين ف قلب بعض دفعة

  ف وسط البلد

اللي حاضن ايد حبيبته
واللي قافش كتف خيبته
وبوسة طالعة ف قلب زحمة
من خطيب لايد خطيبته


نازلين مخصوص لفيلم سيما
من بعده غدوة عليها قيمة
وعشان يبان كريم ف عينها
يجيب هدية عقد زينة


من عجوز واقف لوحده
م الصبحية الحر هده
والشمس مش سايباه ف حاله
لكن محظوظ ولا حد قده


اول ما شاف البلدية
زَوغ ف حتة مدارية
وباعلو كام عقد زينة
لست حلوة اجنبية

  بتتمشى ف وسط البلد

عاجبها شموخ التماثيل
وبرد كوبري قصر النيل
وشمس مصرية حافية
بتنادي ورد ومناديل


ثابتة ف صورة ضوئية
لقطتها ساعة مغربية
ببسمة حروفها حزينة
على صورة كانت حقيقية


لعيون بتصرخ م الوجع
حواليها مليون جدع
جالهم صرع..بالاوامر
مفهومش ولا واحد جدع


وبنت بلدي شعرها مكشوف
ورخص عرضي باين ع الضيوف
لما الاهالي من قريب نهشوه
والظلم طايله من غير كسوف


وانا دمي والع ما بينطفي
من سجن واسع ما بيكتفي
بالع زهور الارض خضرا
على بابه المرؤة بتختفي


قام الكلام شط مني
سألت سين غصب عني 
يا ناس كفاية يا ناس حرام
ليه الظلم ده كله يعني؟!


ف جت اجابة من بعيد
ف كلبش مصنوع من حديد
وتهمة ساكنة بين ضلوعي
خدتني ورى قضبان بعيد


  عن وسط البلد


كلماتي

مصطفي التلواني